တိုက်စစ်မှူးအီဗာနီလ်ဆန်ရဲ့အနီကတ်ပြစ်ဒဏ်ကို မိမိတို့အယူခံဝင်မယ်လို့ ဘုန်းမောက်နည်းပြအီရာအိုလာအတည်ပြု
ဘုန်းမောက်အသင်းနဲ့ မန်ယူနိုက်တက်အသင်းတို့(၁-၁)ဂိုးစီသရေကျခဲ့တဲ့ ပရီးမီးယားလိဂ်ပွဲစဉ်မှာ ထုတ်ပယ်ခံခဲ့ရတဲ့ ဘရာဇီးလ်တိုက်စစ်မှူး အီဗာနီလ်ဆန်ရဲ့အနီကတ်ပြစ်ဒဏ်ကို အယူခံဝင်သွားမယ်လို့ ဘုန်းမောက်အသင်းနည်းပြအီရာအိုလာက ပွဲအပြီးမီဒီယာတွေ့ဆုံမှုမှာ အတည်ပြုခဲ့ပါတယ်။
အီဗာနီလ်ဆန်ဟာ ဒီပွဲရဲ့ပွဲချိန်(၇၁)မိနစ်မှာ မန်ယူနိုက်တက်နောက်ခံလူ မက်ဇ်ရာအူရီကို ဝင်ရောက်ပုံကြမ်းတမ်းခဲ့တယ်ဆိုပြီး ကွင်းလယ်ဒိုင်လူကြီးရဲ့တိုက်ရိုက်အနီကတ်ပြထုတ်ပယ်ခြင်းကို ခံခဲ့ရတာပါ။
ကွင်းလယ်ဒိုင်လူကြီးဟာ အစောပိုင်းက အီဗာနီလ်ဆန်ကို အဝါကတ်သာပြသခဲ့ပေမယ့် VAR ဒိုင်လူကြီးက ဒီဖြစ်ရပ်ကို ပြန်စစ်ဆေးဖို့ အကြောင်းကြားခဲ့တာကြောင့် စစ်ဆေးအပြီးမှာ အဝါကတ်ကို ပယ်ဖျက်ပြီး တိုက်ရိုက်အနီကတ်ပြခဲ့တာဖြစ်ပါတယ်။ ဘုန်းမောက်အသင်းနည်းပြ အီရာအိုလာက တိုက်စစ်မှူးအီဗာနီလ်ဆန်ဟာ ခြေချော်သွားခဲ့တယ်ဆိုပြီး ဒီအနီကတ်ပြသခဲ့တဲ့ ဆုံးဖြတ်ချက်ကို ဒေါသထွက်နေကာ အယူခံဝင်သွားမယ်လို့ ဆိုခဲ့တာပါ။
အီဗာနီလ်ဆန်ဟာ အနီကတ်ကြောင့် ဘုန်းမောက်အသင်းရဲ့ဒီရာသီပရီးမီးယားလိဂ်လက်ကျန်(၄)ပွဲမှာ (၃)ပွဲအထိ ပွဲပယ်ခံရတော့မှာဖြစ်လို့ ဥရောပဝင်ခွင့်ရဖို့ ကြိုးစားနေတဲ့ အသင်းရဲ့မျှော်လင့်ချက်ကို ထိခိုက်သွားစေနိုင်ပါတယ်။ ဒါ့အပြင် ဘုန်းမောက်အသင်းနည်းပြ အီရာအိုလာက ဒီပွဲမှာ သူတို့အနိုင်ရခဲ့ရင် အများကြီးအဓိပ္ပါယ်ရှိမှာဖြစ်ပေမယ့် ရမှတ်(၁)မှတ်ကကြီးမားတဲ့ ခြားနားမှုဖြစ်စေတယ်လို့ ဆိုခဲ့တာပါ။
ဘုန်းမောက်အသင်းဟာ ဒီပွဲရလဒ်ကြောင့် ပရီးမီးယားလိဂ်အမှတ်ပေးဇယားအဆင့်(၁၀)နေရာမှာ ရပ်တည်နေပြီး ကွန်းဖရန့်လိဂ်ဝင်ခွင့်ဖြစ်တဲ့ အဆင့်(၇)နေရာက အက်စတွန်ဗီလာအသင်းနဲ့ (၇)မှတ်ကွာဟနေပါတယ်။
