ရမှတ်တူရင် Play-off ကစားရမယ့်စည်းမျဉ်းအရ အင်တာမီလန်-နာပိုလီ စီးရီးအေချန်ပီယံဗိုလ်လုပွဲကို တွေ့မြင်ရမလား

ဒီရာသီ စီးရီးအေပွဲစဉ်(၃၃)အပြီးမှာ အမှတ်ပေးဇယားထိပ်ဆုံးနှစ်သင်းဖြစ်တဲ့ အင်တာမီလန်အသင်းနဲ့ နာပိုလီအသင်းတို့ ရမှတ်(၇၁)မှတ်စီနဲ့ ထိပ်ဆုံးမှာ ဦးဆောင်နေပါတယ်။

တကယ်လို့သာ ဒီနှစ်သင်းအနေနဲ့ ပွဲစဉ်(၃၈)အပြီးမှာ ဒီလိုရမှတ်တူနေခဲ့မယ်ဆိုရင် ပရိသတ်တွေအနေနဲ့ ထူးထူးခြားခြား စီးရီးအေရဲ့ ချန်ပီယံလုပွဲတစ်ပွဲကို ထပ်ပြီးတွေ့ရမှာပါ။

၂၀၂၂ ခုနှစ်အတွင်းမှာ ပြန်လည်ကျင့်သုံးဖို့ ဆုံးဖြတ်ခဲ့တဲ့ စီးရီးအေအဆုံးအဖြတ်စည်းမျဉ်း(Serie A Tiebreaker Rules)အရ ချန်ပီယံဆုအတွက်ဖြစ်စေ၊ ဥရောပဝင်ခွင့်အတွက်ဖြစ်စေ၊ တန်းဆင်းတစ်နေရာအတွက်ဖြစ်စေ အသင်း(၂)သင်း (သို့မဟုတ်)အသင်း(၂)သင်းထက်ပိုပြီး ရမှတ်တူနေရင် Play-off ပွဲစဉ်(၂ သင်းထက်ပိုရင် ပတ်လည် Play-off ပွဲစဉ်) ကစားရမှာဖြစ်ပါတယ်။ ချန်ပီယံလုပွဲကို ကြားကွင်းမှာ တစ်ကျော့တည်းကစားစေမှာဖြစ်ပြီး တန်းဆင်းတိုက်ပွဲကိုတော့ နှစ်ကျော့ကစားစေမှာဖြစ်ကြောင်း သိရပါတယ်။

ရမှတ်တူတာနဲ့ ဒီလို Play-off ပွဲကစားရမှာဖြစ်ပြီး ဂိုးကွာခြားချက်က ဘယ်အသင်းကို အိမ်ရှင်အသင်းတစ်သင်းလို အခွင့်အရေးပေးမလဲဆိုတာကိုသာ ကြည့်ရှုမှာပါ။ ချန်ပီယံလုပွဲအဖြစ်ကစားရမယ့် ဒီ Play-off ပွဲအပြီးမှာ သရေဆက်ကျနေမယ်ဆိုရင် အချိန်ပိုကစားစေမှာမဟုတ်ဘဲ ပယ်နယ်တီအဆုံးအဖြတ် ခံယူစေမှာဖြစ်ပါတယ်။

အရင်က ဒီလို ချန်ပီယံဆုကိုဗိုလ်လုပွဲလို Play-off ပွဲကစားပြီး လုယူခဲ့ရတာ စီးရီးအေမှာတစ်ကြိမ်ရှိခဲ့ဖူးပါတယ်။ အဲဒါက ၁၉၆၃-၆၄ စီးရီးအေပြိုင်ပွဲမှာဖြစ်ပြီး ရာသီကုန်မှာ ရမှတ်(၅၄)မှတ်စီတူညီနေတဲ့ ဘိုလော့နာနဲ့ အင်တာမီလန်တို့ ချန်ပီယံလုရတာဖြစ်ပြီး တန်းဆင်းဇုန်တစ်နေရာအတွက် ရမှတ်(၂၇)မှတ်စီတူနေတဲ့ ဆမ်ဒိုးရီးယားနဲ့ မိုဒီနာတို့ Play-offs ကစားရတာပါ။

အဲဒီတုန်းက တစ်ပွဲစီသာကစားခဲ့ရပြီး ဘိုလော့နာက အင်တာမီလန်ကို (၂-၀)ဂိုးနဲ့အနိုင်ယူ ဗိုလ်စွဲခဲ့သလို ဆမ်ဒိုးရီးယားက မိုဒီနာကို (၂-၀)ဂိုးနဲ့ အနိုင်ယူပြီး တန်းဆင်းအန္တရာယ်က လွတ်မြောက်ခဲ့ပါတယ်။

ဒါကြောင့် ဒီရာသီမှာ ၁၉၆၄ ခုနှစ်တုန်းကလိုမျိုး ဒီရာသီမှာ အင်တာမီလန်နဲ့ နာပိုလီတို့ ဗိုလ်လုကြမယ့် စီးရီးအေချန်ပီယံဗိုလ်လုပွဲကိုတွေ့မြင်ရမလားဆိုတာ စိတ်ဝင်စားစရာကောင်းနေပါတယ်။