ပုပ်ရဟန်းမင်းကြီး ကွယ်လွန်ခြင်းကို လှောင်ပြောင်ခဲ့လို့ ဝေဖန်ပြစ်တင်ခံနေရတဲ့ ရိန်းဂျားစ်ပရိသတ်
စကော့တလန်ကလပ် ရိန်းဂျားစ်ပရိသတ်တွေဟာ ပုပ်ရဟန်းမင်းကြီး ကွယ်လွန်ခြင်း(ပျံလွန်တော်မူခြင်း)ကို လှောင်ပြောင်၊ စော်ကားလိုတဲ့ အပြုအမူတွေအတွက် ဝေဖန်ပြစ်တင်မှုတွေကို ရင်ဆိုင်နေရပါတယ်။
စကော့တလန်ကလပ်အသင်းကြီးနှစ်သင်းဖြစ်တဲ့ ဆဲလ်တစ်အသင်းနဲ့ ရိန်းဂျားစ်အသင်းတို့ဟာ ပြိုင်ဆိုင်မှုပြင်းထန်တဲ့ ပြိုင်ဘက်အသင်းတွေဖြစ်ကြပြီး ဆဲလ်တစ်အသင်းအားပေးသူ ပရိသတ်အများစုက ကက်သလစ်ခရစ်ယာန်ဘာသာဝင်တွေဖြစ်ကြသလို ဆဲလ်တစ်အသင်းကလည်း အိုင်ယာလန်လူမျိုးကက်သလစ်ဘာသာဝင်တစ်ဦးက တည်ထောင်ခဲ့တာပါ။
ရိန်းဂျားစ်ပရိသတ်အများစုကတော့ ပရိုတက်စတင့်ခရစ်ယာန်ဘာသာဝင်တွေဖြစ်ကြပြီး ပရိုတက်စတင့်တွေက သာသနာဂိုဏ်းချုပ်ပုဂ္ဂိုလ်ဖြစ်တဲ့ ပုပ်ရဟန်းမင်းကြီးထားရှိတဲ့အယူဝါဒ မရှိသူတွေဖြစ်ပါတယ်။
ဒါကြောင့် ဒီတစ်ပတ်တနင်္လာနေ့နံနက်ပိုင်းက ပုပ်ရဟန်းမင်းကြီးဖရန့်စစ်ကွယ်လွန်ခဲ့ပြီးနောက်မှာ ရိန်းဂျားစ်ပရိသတ်တချို့က တစ်စခန်းထ လာကြတာဖြစ်ပါတယ်။
စကော့တလန်နိုင်ငံ၊ ဂလပ်စဂိုမြို့ရဲ့ M8 နဲ့ M77 အဝေးပြေးလမ်းမကြီးတွေအနီးက မက်ကလာရင်လမ်းက နံရံတစ်ခုမှာ 'No Pope of Rome' ၊ 'Papa Francesco is dead'ဆိုတဲ့ နံရံဆေးရေးပန်းချီ(ဂရစ်ဖစ်တီ)တွေကို ရိန်းဂျားစ်ပရိသတ်တချို့က ရေးခြယ်ခဲ့ကြတာပါ။
ဒီလုပ်ရပ်က ပြိုင်ဘက်ဆဲလ်တစ်ပရိသတ်တွေကို ဒေါသထွက်စေဖို့ အဓိကရည်ရွယ်တာဖြစ်ပေမယ့် မတူကွဲပြားခြားနားမှုတွေမှာ တစ်ဖက်သားကို လေးစားမှုမရှိတဲ့လုပ်ရပ်ဖြစ်လို့ အွန်လိုင်းမှာ ဝေဖန်မှုတွေ မြင့်တက်ခဲ့ပါတယ်။
ဆိုရှယ်မီဒီယာမှာ ရိန်းဂျားစ်ပရိသတ်တွေကို ဝေဖန်သူတွေများနေပြီး ဒီအထဲမှာ ဘာသာမဲ့တွေကပါ ရိန်းဂျားစ်ပရိသတ်တွေကို လေးစားမှုမရှိသူတွေအဖြစ် ပြစ်တင်ခဲ့ကြပါတယ်။
ပုပ်ရဟန်းမင်းကြီးဖရန့်စစ်ကွယ်လွန်ခဲ့တာကြောင့် မနေ့က ကစားဖို့ စီစဉ်ထားတဲ့စီးရီးအေ ပွဲ(၄)ပွဲကို ရွှေ့ဆိုင်းခဲ့ပြီး မနက်ဖြန်(ဗုဒ္ဓဟူးနေ့)မှ ကစားမှာဖြစ်သလို၊ ရောမမြို့က ဗာတီကန်စီးတီးမှာ ဈာပနအခမ်းအနားပြုလုပ်မယ့် လာမယ့် စနေနေ့မှာလည်း မူလ ကစားဖို့စီစဉ်ထားတဲ့ စီးရီးအေပွဲ(၃)ပွဲကို ရွှေ့ဆိုင်းသွားမှာဖြစ်ပါတယ်။
