PSG နဲ့ပွဲမှာ ပွဲမထွက်ခဲ့ရတဲ့အတွက် မိမိဒေါသထွက်တယ်လို့ နည်းပြဖြစ်သူထံ အသိပေးခဲ့ကြောင်း ဝက်ကင်စ်ဝန်ခံပြောဆို
အက်စတွန်ဗီလာအသင်းက နယူးကာဆယ်အသင်းကို (၄-၁)ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အက်စတွန်ဗီလာအသင်းအတွက် (၁)ဂိုးသွင်းပြီး ဂိုးဖန်တီးမှု(၁)ကြိမ်ပြုလုပ်နိုင်ခဲ့တဲ့ တိုက်စစ်မှူးဝက်ကင်စ်က ပြီးခဲ့တဲ့ PSG အသင်းနဲ့ ချန်ပီယံလိဂ်ပွဲစဉ်မှာ အရန်ခုံပေါ်ထိုင်ရတဲ့အတွက် သူဒေါသထွက်တယ်လို့ နည်းပြအူနိုင်းအမ်မရီထံ အသိပေးခဲ့ကြောင်း ဖွင့်ဟပြောဆိုခဲ့ပါတယ်။
ဝက်ကင်စ်ဟာ ပြီးခဲ့တဲ့ PSG အသင်းနဲ့ ချန်ပီယံလိဂ်ကွာတားဖိုင်နယ်နှစ်ကျော့စလုံးမှာ အက်စတွန်ဗီလာအသင်းအတွက် လူစားဝင်အဖြစ်သာ ပါဝင်ခဲ့ရတာပါ။ ဝက်ကင်စ်ဟာ အက်စတွန်ဗီလာအသင်းရဲ့အဓိကတိုက်စစ်မှူးဖြစ်ပေမယ့် ပြီးခဲ့တဲ့ပွဲစဉ်တွေမှာ နည်းပြအူနိုင်းအမ်မရီဟာ သူ့ထက် မန်ယူနိုက်တက်အသင်းကနေ အငှားနဲ့ခေါ်ယူထားတဲ့ တိုက်စစ်မှူးရပ်ရှ်ဖိုဒ့်ကို ပွဲထွက်လူစာရင်းထဲ အသုံးပြုခဲ့တာဖြစ်ပါတယ်။
အင်္ဂလန်တိုက်စစ်မှူးဝက်ကင်စ်ဟာ အက်စတွန်ဗီလာအသင်းအတွက် ချန်ပီယံလိဂ်ဝင်ခွင့်ရဖို့အရေးပါတဲ့ နယူးကာဆယ်အသင်းနဲ့ပွဲစဉ်မှာတော့ ပွဲထွက်လူစာရင်းထဲပါဝင်ပြီး ခြေစွမ်းပြသနိုင်ခဲ့တာပါ။
ဝက်ကင်စ်က "PSG အသင်းနဲ့(၂)ပွဲလုံးမှာ မိနစ်(၂၀)ကစားခဲ့ရပါတယ်။ ကျွန်တော်ဟာ ပွဲမကစားခဲ့ရတဲ့အတွက် ဒေါသထွက်တယ်ဆိုတာ လိမ်ပြောနေမှာမဟုတ်ပါဘူး။ ကျွန်တော်ဒါကို နည်းပြအူနိုင်းအမ်မရီကို သိစေခဲ့ပါတယ်။ သူ့ဆုံးဖြတ်ချက်ကို လေးစားပေမယ့် ကျွန်တော်ဟာ အရန်ခုံပေါ်မှာ ထိုင်ရတာကို ပျော်တဲ့ကစားသမားမဟုတ်ပါဘူး။ အရေးပါတဲ့ပွဲတွေမှာ ကျွန်တော် ပွဲထွက်ကစားသမားဖြစ်ချင်တယ်"လို့ Sky Sports မှာ ဆိုခဲ့ပါတယ်။
အသက်(၂၉)နှစ်အရွယ်ရှိ ဝက်ကင်စ်ဟာ ဒီရာသီမှာ အက်စတွန်ဗီလာအသင်းအတွက် ပရီးမီးယားလိဂ်သွင်းဂိုး(၁၅)ဂိုးသွင်းယူထားပြီး ဘယ်အင်္ဂလိပ်ကစားသမားတွေထက်မဆို ပိုပြီးများပြားနေတာပါ။ နယူးကာဆယ်အသင်းကို အနိုင်ရခဲ့တာကြောင့် ပရီးမီးယားလိဂ်အမှတ်ပေးဇယားအဆင့်(၆)နေရာမှာ ရပ်တည်နေတဲ့ အက်စတွန်ဗီလာအသင်းဟာ လာမယ့်ကြားရက်မှာ ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာဖြစ်ပါတယ်။
