ပရီးမီးယားလိဂ်ပြိုင်ပွဲမှာ ဖာဂူဆန်ကိုင်တွယ်စဉ်အချိန်ကထက် ရှုံးပွဲအရေအတွက်ပိုများလာတဲ့ မန်ယူနိုက်တက်
မန်ယူနိုက်တက်အသင်းဟာ ဒီတစ်ပတ်ပရီးမီးယားလိဂ်ပွဲစဉ် နယူးကာဆယ်(၄-၁)မန်ယူနိုက်တက်ပွဲမှာ ရှုံးနိမ့်ခဲ့ပြီးနောက် ဖာဂူဆန်ခေတ်လွန်ကာလ ပရီးမီးယားလိဂ်ပွဲစဉ်တွေမှာ ရှုံးပွဲ(၁၁၅)ပွဲအထိရှိလာပါတယ်။
နည်းပြကြီးဖာဂူဆန်အနားယူခဲ့တဲ့ ၂၀၁၂-၁၃ ရာသီနောက်ပိုင်း မန်ယူနိုက်တက်အသင်းဟာ (၁၂)ရာသီအတွင်း ပရီးမီးယားလိဂ်ပွဲစဉ်တွေမှာ ရှုံးပွဲ(၁၁၅)ပွဲအထိရှိခဲ့တာဖြစ်ပြီး အသင်းကို ဖာဂူဆန်ကိုင်တွယ်စဉ်က ရှုံးပွဲအရေအတွက်ထက် ပိုမိုများပြားနေပါတယ်။
မန်ယူနိုက်တက်အသင်းကို ဖာဂူဆန်ကိုင်တွယ်စဉ်က ပရီးမီးယားလိဂ်ပွဲ(၈၁၀)မှာနိုင်ပွဲ(၅၂၈)ပွဲ၊ သရေပွဲ(၁၆၈)ပွဲ၊ ရှုံးပွဲ(၁၁၄)ပွဲ ရှိခဲ့တာဖြစ်ပြီး ဖာဂူဆန်ခေတ်လွန်ကာလမှာ ပွဲ(၄၅၀)မှာပဲ (၁၁၅)ပွဲရှုံးနိမ့်ခဲ့တာဖြစ်ပါတယ်။
ဒါကြောင့် ဖာဂူဆန်ခေတ်လွန် မန်ယူနိုက်တက်အသင်းအနေနဲ့ ဖာဂူဆန်လက်ထက်ကထက် ပွဲ(၃၆၀)ပွဲအထိ လျော့နည်းပေမယ့် ရှုံးပွဲအရေအတွက်မှာ ပိုများနေတာဖြစ်ပါတယ်။
မန်ယူနိုက်တက်အသင်းကို နယူးကာဆယ်က (၄)ဂိုးအထိသွင်းယူနိုင်တာလည်း ပရီးမီးယားလိဂ်သက်တမ်းတစ်လျှောက် ၂၀၀၁ ခုနှစ်နောက်ပိုင်း ဂိုးအများဆုံးသွင်းယူနိုင်ခဲ့တာဖြစ်ပါတယ်။ ၂၀၀၁ ခုနှစ်က ဒီနှစ်သင်းတွေ့တဲ့ပွဲမှာ နယူးကာဆယ်အသင်းက (၄-၃)ဂိုးနဲ့အနိုင်ရခဲ့ပြီး ဒီပွဲနောက်ပိုင်း ဂိုးအများဆုံးသွင်းယူနိုင်တာဖြစ်ပါတယ်။
ဒီပွဲမှာ နယူးကာဆယ်တောင်ပံကစားသမားဟာဗေးဘန်းစ်ဟာ ပွဲချိန်(၄၉)မိနစ်နဲ့ (၆၄)မိနစ်တွေမှာ အသင်းအတွက် အနိုင်ဂိုး(၂)ဂိုးသွင်းယူနိုင်ခဲ့ပါတယ်။ ဟာဗေးဘန်းစ်အနေနဲ့ ၂၀၀၀ ခုနှစ်က မန်ယူနိုက်တက်အသင်းဘက်ကို ပရီးမီးယားလိဂ်ဂိုး(၂)ဂိုးသွင်းယူနိုင်ခဲ့တဲ့ ဂန္ထဝင်တိုက်စစ်မှူးဟောင်းအလန်ရှီးယားအပြီး ဒီလိုစွမ်းဆောင်နိုင်တဲ့ ပထမဆုံးနယူးကာဆယ်ကစားသမားအဖြစ် မှတ်တမ်းဝင်ခဲ့ပါတယ်။
