နောက်ဆုံး(၁၅)ရာသီအတွင်း ကြီး(၆)ကြီးစာရင်းဝင်အသင်းတွေထဲမှာ အဆိုးရွားဆုံးရပ်တည်မှုကို ပိုင်ဆိုင်ရဖွယ်ရှိနေတဲ့ မန်ယူနိုက်တက်နဲ့ စပါး
မန်ယူနိုက်တက်အသင်းနဲ့ စပါးအသင်းတို့ဟာ ပရီးမီးယားလိဂ်ကြီး(၆)ကြီးစာရင်းဝင်အသင်းတွေထဲမှာ ၂၀၀၉ ခုနှစ်နောက်ပိုင်း (ပြီးခဲ့တဲ့ ၁၅ ရာသီအတွင်း) အဆိုးရွားဆုံးပရီးမီးယားလိဂ်ရပ်တည်မှုကို ပိုင်ဆိုင်ရဖွယ်ရှိနေပါတယ်။
ဒီရာသီ ပရီးမီးယားလိဂ်ပွဲစဉ်(၃၂)ကစားပြီးချိန်မှာ မန်ယူနိုက်တက်အသင်းဟာ (၁၀)ပွဲသာအနိုင်ရခဲ့ပြီး (၈)ပွဲသရေ၊ (၁၄)ပွဲရှုံးရလဒ်ကြောင့် ရမှတ်(၃၈)မှတ်သာရပြီး အဆင့်(၁၄)နေရာမှာ ရပ်တည်နေပါတယ်။
စပါးအသင်းကလည်း ပရီးမီးယားလိဂ်ပွဲစဉ်(၃၂)ကစားပြီးချိန်မှာ (၁၁)ပွဲသာအနိုင်ရခဲ့ပြီး (၄)ပွဲသရေ၊ (၁၇)ပွဲရှုံးရလဒ်ကြောင့် ရမှတ်(၃၇)မှတ်သာရပြီး အဆင့်(၁၅)နေရာမှာ ရပ်တည်နေပါတယ်။
မန်ယူနိုက်တက်အသင်းဟာ ပြီးခဲ့တဲ့ ၂၀၂၃-၂၄ ရာသီက နည်းပြတန်ဟတ်လက်ထက်မှာ ပရီးမီးယားလိဂ်အဆိုးရွားဆုံးရပ်တည်မှုအဖြစ် အဆင့်(၈)နဲ့ အဆုံးသတ်ခဲ့ရပြီး၊ စပါးကလည်း ၂၀၀၉ ခုနှစ်နောက်ပိုင်း ပရီးမီးယားလိဂ်အဆိုးရွားဆုံးရပ်တည်မှုအဖြစ် ၂၀၂၂-၂၃ ရာသီမှာ အဆင့်(၈)နဲ့ ရာသီကို အဆုံးသတ်ခဲ့ရတာပါ။
၂၀၀၉ ခုနှစ်နောက်ပိုင်း (ပြီးခဲ့တဲ့ ၁၅ ရာသီအတွင်း) ၂၀၂၂-၂၃ ရာသီမှာ အဆင့်(၁၂)ရခဲ့တဲ့ချယ်လ်ဆီးအသင်းကလွဲလို့ ကျန်ပရီးမီးယားလိဂ်ကြီး(၆)ကြီးစာရင်းဝင်အသင်းတွေအနေနဲ့ အဆင့်(၈)အထိသာ အဆိုးရွားဆုံးရောက်ခဲ့ဖူးတာပါ။
မန်စီးတီးအသင်းက ၂၀၀၉-၁၀ ရာသီမှာ အဆင့်(၅)၊ အာဆင်နယ်အသင်းက ၂၀၂၁-၂၂ ရာသီမှာ အဆင့်(၈)၊ လီဗာပူးလ်အသင်းက ၂၀၁၅-၁၆ ရာသီမှာ အဆင့်(၈)၊ မန်ယူနိုက်တက်အသင်းက ၂၀၂၃-၂၄ ရာသီမှာ အဆင့်(၈)နဲ့ စပါးအသင်းက ၂၀၂၂-၂၃ ရာသီမှာ အဆင့်(၈)နေရာတွေ ရပ်တည်ခဲ့တာက နောက်ဆုံး(၁၅)နှစ်အတွင်း ကြီး(၆)ကြီးစာရင်းဝင်အသင်းတွေအတွက် အဆိုးရွားဆုံးရပ်တည်မှုတွေဖြစ်ခဲ့တာပါ။
ဒါကြောင့် မန်ယူနိုက်တက်နဲ့ စပါးအသင်းအနေနဲ့ လက်ကျန်ပွဲ(၆)ပွဲမှာ ရလဒ်ကောင်းတွေဆက်တိုက်ရယူပြီး ဒီဆိုးရွားတဲ့ရပ်တည်မှုတွေကနေ ရုန်းထွက်ပြီး အပေါ်ကိုတက်လာနိုင်မလား၊ ရလဒ်ဆိုးတွေနဲ့အတူ မှတ်တမ်းဆိုးတွေကို ဆက်လက်ရေးထိုးမလားဆိုတာ ကြည့်ရမှာပါ။
