မိမိအသင်းအပေါ် စိုးရိမ်စရာမရှိဘူးလို့ အာဆင်နယ်-PSG ချန်ပီယံလိဂ်ပွဲမတိုင်မီ လူးဝစ်အင်းနရစ် ဆို

PSG အသင်းဟာ နိုက်စ်အသင်းကို (၁-၃)ဂိုးနဲ့ အရေးနိမ့်ပြီး ဒီရာသီပြင်သစ်လီဂူး-၁ ပြိုင်ပွဲမှာ ပထမဆုံးရှုံးပွဲကြုံတွေ့ခဲ့ပြီးနောက် PSG အသင်းနည်းပြလူးဝစ်အင်းနရစ်က လာမယ့် အာဆင်နယ်အသင်းနဲ့ ချန်ပီယံလိဂ်ပွဲစဉ်အတွက် မိမိရဲ့အသင်းအပေါ် စိုးရိမ်စရာမရှိဘူးလို့ ဆိုခဲ့ပါတယ်။

PSG အသင်းဟာ နိုက်စ်အသင်းနဲ့ လီဂူး-၁ ပွဲစဉ်မှာ ဂိုးပေါက်ကန်သွင်းမှု(၃၂)ကြိမ်အထိ ပြုလုပ်နိုင်ခဲ့ပေမယ့် အရေးနိမ့်ခဲ့တာပါ။

PSG အသင်းဟာ ပြင်သစ်လီဂူး-၁ ပွဲစဉ်မှာ ရှုံးပွဲကြုံတွေ့ပြီးနောက် လာမယ့်ကြားရက်ထဲမှာ ယှဉ်ပြိုင်မယ့် အာဆင်နယ်အသင်းနဲ့ ချန်ပီယံလိဂ်ဆီမီးဖိုင်နယ်(ပထမအကျော့)ပွဲစဉ်ကို အာရုံစိုက်ရတော့မှာဖြစ်ပါတယ်။ PSG အသင်းပရိသတ်တွေဟာ နိုက်စ်အသင်းနဲ့ပွဲစဉ်မှာ "အာဆင်နယ်အသင်းကို ဖြုတ်ချပြီး ဗိုလ်လုပွဲရောက်ရှိအောင်သွားပါ"လို့ ရေးသားထားတဲ့စာတန်းကို ပြသခဲ့ကြပါတယ်။

လူးဝစ်အင်းနရစ်က "ဒီပွဲမှာ ကျွန်တော်တို့အတွက် ရလဒ်မကောင်းခဲ့ပေမယ့် ဂိုးသွင်းဖို့အခွင့်အရေးအကြိမ်(၃၀)အထိရှိတဲ့ အသင်းကိုမြင်တွေ့ခဲ့ရပါတယ်။ ကျွန်တော်စိုးရိမ်မှုလုံးဝမရှိပါဘူး။ ကျွန်တော်တို့ဟာ ပြင်သစ်မှာ အကောင်းဆုံးအသင်းဖြစ်ပြီး ဒါကို သက်သေပြသခဲ့ပါတယ်။ ကျွန်တော်တို့ဟာ အခုအချိန်မှာ သတ္တိရှိရှိနဲ့ ချန်ပီယံလိဂ်ဖလားရယူနိုင်မယ့်အကြောင်း စဉ်းစားရမှာပါ"လို့ ဆိုခဲ့ပါတယ်။

အာဆင်နယ်နဲ့ PSG အသင်းတို့ဟာ ဒီရာသီချန်ပီယံလိဂ်ပြိုင်ပွဲ အုပ်စုအဆင့်မှာတွေ့ဆုံခဲ့ပြီး အာဆင်နယ်အသင်းက (၂-ဝ)ဂိုးနဲ့ အနိုင်ရရှိခဲ့ပါတယ်။