လေ့ကျင့်ရေးကွင်းရန်ပွဲမှာ နူနက်ဇ်ပါဝင်ခဲ့တယ်ဆိုတဲ့ သတင်းတွေကိုလီဗာပူးလ်အသင်းနည်းပြအာနီဆလော့ငြင်းဆန်
ပြီးခဲ့တဲ့ ဝက်စ်ဟမ်းအသင်းနဲ့ ပရီးမီးယားလိဂ်ပွဲစဉ်မှာ လီဗာပူးလ်အသင်းလူစာရင်းက ချန်လှပ်ခံခဲ့ရတဲ့ တိုက်စစ်မှူးဒါဝင်နူနက်ဇ်ဟာ အသင်းရဲ့လေ့ကျင့်ရေးကွင်းရန်ပွဲမှာ ပါဝင်ခဲ့တယ်ဆိုပြီး ထွက်ပေါ်ခဲ့တဲ့ သတင်းတွေကို လီဗာပူးလ်အသင်းနည်းပြ အာနီဆလော့က ငြင်းဆန်ခဲ့ပါတယ်။
လီဗာပူးလ်အသင်းတိုက်စစ်မှူးဒါဝင်နူနက်ဇ်ဟာ ဝက်စ်ဟမ်းအသင်းနဲ့ ပွဲစဉ်ကို ပွဲကြည့်စင်ပေါ်ကနေ အားပေးခဲ့ရတာဖြစ်ပါတယ်။ လီဗာပူးလ်အသင်းနည်းပြအာနီဆလော့က ဝက်စ်ဟမ်းအသင်းနဲ့ ပွဲမတိုင်မီဖြစ်ခဲ့တဲ့ လေ့ကျင့်ရေးကွင်းရန်ပွဲမှာ ဒါဝင်နူနက်ဇ်မပါဝင်ကြောင်း ငြင်းခဲ့ပေမယ့် သူ့ကို လူစာရင်းမှာချန်လှပ်ခဲ့တာက ဖျားနာတာကြောင့်မဟုတ်သလို ဒဏ်ရာကြောင့်လည်း မဟုတ်ဘူးလို့ မီဒီယာသမားတွေနဲ့ တွေ့ဆုံချိန်မှာ ဆိုခဲ့ပါတယ်။
ဒါ့အပြင် အာနီဆလော့က ဒါဝင်နူနက်ဇ်ဟာ သူ့ကိုယ်သူကောင်းမွန်တယ်လို့ မခံစားရတာကြောင့် ကွင်းထဲက ထွက်ခွာခဲ့တာဖြစ်ပြီး လက်စတာအသင်းနဲ့ ပွဲစဉ်မှာ လီဗာပူးလ်အသင်းလူစာရင်းထဲ ပြန်ပါဝင်နိုင်တယ်လို့ ဆိုခဲ့တာပါ။ ဆော်ဒီပရိုလိဂ်ကလပ်အသင်းတွေရဲ့ချိတ်ဆက်မှုတွေကို ခံနေရတဲ့ ဥရုဂွေးတိုက်စစ်မှူး ဒါဝင်နူနက်ဇ်ဟာ လီဗာပူးလ်အသင်းမှာ အနာဂတ်မရေရာဘဲ နွေရာသီမှာ ထွက်ခွာသွားနိုင်တာဖြစ်ပါတယ်။
လီဗာပူးလ်အသင်းဟာ လာမယ့်ပရီးမီးယားလိဂ်ပွဲစဉ်မှာ လက်စတာအသင်းကို အနိုင်ရပြီး အမှတ်ပေးဇယားအဆင့်(၂)နေရာက အာဆင်နယ်အသင်းက အစ်ဝှစ်ခ်ျအသင်းကို အရေးနိမ့်ခဲ့ရင် ချန်ပီယံဆုရယူနိုင်ဖို့ သေချာသွားမှာပါ။ လီဗာပူးလ်အသင်းနည်းပြအာနီဆလော့က သူဟာ ဒီအကြောင်းကို မတွေးဘဲ လက်စတာအသင်းကို အနိုင်ရဖို့အတွက်သာ အာရုံစိုက်ထားတယ်လို့ ဆိုခဲ့တာဖြစ်ပါတယ်။
