ဒီနေ့ရဲ့အကြိုက်ဆုံးပွဲများ ကြိုတင်ရင်ခုန်သံ

ချန်ပီယံလိဂ်(ဆီမီးဖိုင်နယ်)
ပထမအကျော့

အာဆင်နယ် - PSG
(30 April 2025/ 1:30 am)

ဒီရာသီမှာ အာဆင်နယ်က ပရီးမီးယားလိဂ်အမှတ်ပေးဇယားမှာ ဒုတိယအသင်း၊ PSG က ပြင်သစ်လိဂ်ချန်ပီယံအသင်းဆိုပေမယ့် ချန်ပီယံလိဂ်အုပ်စုအဆင့်တွေ့ဆုံမှုမှာ အာဆင်နယ်က PSG ကို ကိုင်ဟာဗက်ဇ်၊ ဆာကာတို့ရဲ့ဂိုးတွေနဲ့အတူ (၂-၀)ဂိုးနဲ့အနိုင်ယူထားတယ်။

အာဆင်နယ်က ချန်ပီယံလိဂ်အိမ်ကွင်းပွဲတွေမှာ အတော်ကို စိတ်ချရတဲ့အသင်းဖြစ်ပြီး ဒီပြိုင်ပွဲနဲ့ (၆)နှစ်ကြာဝေးကွာပြီးနောက်ပိုင်း ပြန်ကစားခဲ့တဲ့ နောက်ဆုံး(၂)ရာသီအိမ်ကွင်း ချန်ပီယံလိဂ် (၁၁)ပွဲမှာ (၉)ပွဲအထိနိုင်ခဲ့တယ်။ ထူးခြားတာက ဒီနိုင်တဲ့(၉)ပွဲစလုံး ပြိုင်ဘက်အသင်းတွေကို ဂိုးလုံး၀မပေးခဲ့ရဘဲ Clean-Sheet ရလဒ်တွေနဲ့ နိုင်ခဲ့တာဖြစ်တယ်။ အာဆင်နယ်ဂိုးမပေးဘဲ အနိုင်ရခဲ့တဲ့အသင်းတွေထဲမှာ PSV၊ ဆီဗီလာ၊ ပေါ်တို၊ PSG ၊ မိုနာကို၊ ရီးရဲလ်မက်ဒရစ်အစရှိတဲ့ ခြေစွမ်းခြေစမသေးတဲ့၊ တိုက်စစ်အားကောင်းတဲ့အသင်းတွေပါတယ်။

အာဆင်နယ်က ဒီလိုအိမ်ကွင်းမှတ်တမ်းကောင်းရှိပေမယ့် PSG ကတော့ နောက်ဆုံး(၂)ရာသီ အဝေးကွင်းပွဲတွေမှာ ရလဒ်ဆိုးတွေ အတော်များများတွေ့ခဲ့ရတယ်။ (၂)ရာသီအတွင်း အဝေးကွင်းချန်ပီယံလိဂ်(၁၄)ပွဲမှာ တစ်ဝက်တိတိဖြစ်တဲ့ (၇)ပွဲကို ရှုံးခဲ့တယ်။ ဒီရှုံးပွဲတွေထဲမှာ နယူးကာဆယ်၊ အာဆင်နယ်၊ ဗီလာအစရှိတဲ့ အင်္ဂလန်အသင်းတွေပါခဲ့တယ်။

Round of 16 မှာ လီဗာပူးလ်၊ ကွာတားဖိုင်နယ်မှာ ဗီလာအစရှိတဲ့ အင်္ဂလန်အသင်းတွေကို ဖြတ်ကျော်ခဲ့တဲ့ PSG အသင်းအနေနဲ့ ဆီမီးဖိုင်နယ်မှာတော့ အာဆင်နယ်ကို ကျော်ဖြတ်ဖို့ ခက်ခဲမှာဖြစ်သလို အာဆင်နယ်ကွင်းမှာကစားရမယ့် ပထမအကျော့ပွဲကလည်း လွယ်ကူတဲ့ပွဲတစ်ပွဲမဖြစ်လာမှာ အမှန်ပဲ။

အာဆင်နယ်မှာ ဂျေးဆူ၊ တိုမီယာဆု၊ ကိုင်ဟာဗက်ဇ်၊ ဂါဘရီယယ်တို့က ထုံးစံအတိုင်း နားနေရဦးမှာဖြစ်ပြီး ဂျော်ဂျင်ညို၊ ကာလာဖီအိုရီအစရှိတဲ့ ကစားသမားတွေလည်း ပါဝင်နိုင်ဦးမှာမဟုတ်ဘူး။ ပါတေးကလည်း ပွဲပယ်ပြစ်ဒဏ်ထိထားတယ်။ PSG ကတော့ ဒဏ်ရာရ/ပွဲပယ် ကင်းရှင်းနေတယ်။

ဒီလိုအခြေအနေရှိသည့်တိုင် အာဆင်နယ်အနေနဲ့ အိမ်ကွင်းမှာ PSG ကို ကျန်ရှိနေတဲ့ကစားသမားတွေနဲ့ အသာရအောင် ကစားနိုင်မယ်လို့ မျှော်လင့်ပါတယ်။ အိမ်ရှင်အသင်းပဲ ရွေးချင်တယ်။ (၂-၀)(၂-၁)လို ရလဒ်မျိုးကို ကြိုက်မိတယ်။