စပိန်ဘုရင့်ဖလားဗိုလ်လုပွဲကို သပိတ်မှောက်မယ်ဆိုတဲ့သတင်းတွေကို ရီးရဲလ်မက်ဒရစ်ငြင်းဆန်

ရီးရဲလ်မက်ဒရစ်အသင်းဟာ ဘာစီလိုနာအသင်းနဲ့ ယှဉ်ပြိုင်မယ့် စပိန်ဘုရင့်ဖလားဗိုလ်လုပွဲကို ကိုင်တွယ်မယ့် ဒိုင်လူကြီးအဖွဲ့ရဲ့မှတ်ချက်တွေကြောင့် ပွဲကြိုမီဒီယာတွေ့ဆုံမှုနဲ့ လေ့ကျင့်ခန်းအစီအစဉ်ကို မပြုလုပ်ခဲ့ပေမယ့် ဒီပွဲကိုသပိတ်မှောက်မယ်ဆိုတဲ့ သတင်းတွေကိုတော့ မဟုတ်မှန်ကြောင်း ငြင်းဆန်ခဲ့ပါတယ်။

ကွင်းလယ်ဒိုင်လူကြီး ရီကာဒိုဒီဘာဂို့စ်နဲ့ VAR ဒိုင်လူကြီး ပါဘလိုဂွန်ဇာလက်ဇ်တို့ဟာ ဒိုင်လူကြီးတွေကို မကြာခဏဝေဖန်မှုတွေပြုလုပ်တဲ့ ရီးရဲလ်မက်ဒရစ်အသင်း TV အကြောင်းကို မီဒီယာသမားတွေနဲ့ တွေ့ဆုံချိန်မှာ မှတ်ချက်ပေးခဲ့တာပါ။

ကွင်းလယ်ဒိုင်လူကြီး ရီကာဒိုဒီဘာဂို့စ်က ရီးရဲလ်မက်ဒရစ်အသင်း TV က ထုတ်လွှင့်ခဲ့တဲ့ ရုပ်သံမှာ သူဟာ ဘာစီလိုနာအသင်းကို ဘက်လိုက်ခဲ့တယ်ဆိုပြီး ဖော်ပြခံခဲ့ရတာကြောင့် ကျောင်းမှာ သူ့ရဲ့သားဟာ အနိုင်ကျင့်ခံရတယ်လို့ပြောခဲ့တာပါ။ ရီးရဲလ်မက်ဒရစ်အသင်းတာဝန်ရှိသူတွေဟာ ဒီမှတ်ချက်တွေကို ကြားခဲ့ရပြီးနောက် ဒေါသထွက်ခဲ့ပါတယ်။

ရီးရဲလ်မက်ဒရစ်အသင်းဟာ ဒီပွဲအတွက် ဒိုင်လူကြီးအဖွဲ့ပြောင်းလဲပေးဖို့ စပိန်ဘောလုံးအဖွဲ့ချုပ်(RFEF)ကို တောင်းဆိုမှုတွေပြုလုပ်ခဲ့ပါတယ်။

ဒါပေမယ့် RFEF က သူတို့ရဲ့တောင်းဆိုမှုကို ငြင်းပယ်ခဲ့တဲ့အတွက် ရီးရဲလ်မက်ဒရစ်အသင်းဟာ ပွဲကြိုမီဒီယာတွေ့ဆုံမှုကို တက်ရောက်မှာမဟုတ်သလို နောက်ဆုံးလေ့ကျင့်ခန်းအစီအစဉ်ကို ပြုလုပ်မှာမဟုတ်ဘူးလို့ ကြေညာခဲ့ပါတယ်။ အဲဒီနောက် ရီးရဲလ်မက်ဒရစ်အသင်းဟာ စပိန်ဘုရင့်ဖလားဗိုလ်လုပွဲကိုပါ သပိတ်မှောက်နိုင်တယ်ဆိုပြီး သတင်းတွေထွက်ပေါ်လာခဲ့တာပါ။

ဒါပေမယ့် ရီးရဲလ်မက်ဒရစ်အသင်းက သူတို့ဟာ ဘာစီလိုနာအသင်းနဲ့ စပိန်ဘုရင့်ဖလားဗိုလ်လုပွဲကို ယှဉ်ပြိုင်မယ်လို့ အတည်ပြုခဲ့ပြီး ပွဲကိုကိုင်တွယ်မယ့် ဒိုင်လူကြီးအဖွဲ့ကိုသာ ဆန့်ကျင်မှုတွေ ပြုလုပ်ခဲ့တာဖြစ်ပါတယ်။