အင်္ဂလန်အမှတ်ပေးချန်ပီယံဆုကို ကိုင်မြှောက်နိုင်မယ့် ပထမဆုံး ဒတ်ချ်လူမျိုးနည်းပြနဲ့ဒတ်ချ်လူမျိုးအသင်းခေါင်းဆောင်
၁၈၈၈ ခုနှစ်က စတင်ခဲ့တဲ့ အင်္ဂလန်အမှတ်ပေးပြိုင်ပွဲသမိုင်းတစ်လျှောက် ချန်ပီယံဆု ရယူဆွတ်ခူးနိုင်ခဲ့တဲ့နည်းပြတွေကို လူမျိုးအလိုက် အမျိုးအစားခွဲရင် လူမျိုး(၉)ခုသာတွေ့ရပါလိမ့်မယ်။
အင်္ဂလန်၊ စကော့တလန်၊ စပိန်၊ အီတလီ၊ ပြင်သစ်၊ ပေါ်တူဂီ၊ အိုင်ယာလန်၊ ချီလီ၊ ဂျာမနီ အစရှိတဲ့နိုင်ငံတွေက နည်းပြတွေသာ သက်တမ်းအားဖြင့်(၁၃၇)နှစ်ကြာမြင့်နေပြီဖြစ်တဲ့ အင်္ဂလန်အမှတ်ပေးပြိုင်ပွဲရဲ့ချန်ပီယံဆုကို ရယူဆွတ်ခူးခဲ့ဖူးတာပါ။
အခုနှစ်မှာတော့ နောက်ထပ် လူမျိုးတစ်ဦးတိုးလာတော့မှာဖြစ်ပြီး နယ်သာလန်/ဒတ်ချ်လူမျိုးဖြစ်ပါတယ်။ ဒီရာသီ ပရီးမီးယားလိဂ်ချန်ပီယံဆုကို လီဗာပူးလ်အသင်းက ရယူဖို့သေချာနေပြီး လီဗာပူးလ်အသင်းနည်းပြအာနီဆလော့ဟာ ပရီးမီးယားလိဂ်မှာသာမက အင်္ဂလန်အမှတ်ပေးပြိုင်ပွဲသမိုင်းမှာပါ ချန်ပီယံဆုရယူနိုင်တဲ့ ပထမဆုံးဒတ်ချ်လူမျိုးနည်းပြ ဖြစ်လာတော့မှာ ဖြစ်ပါတယ်။
အာနီဆလော့လိုပဲ လီဗာပူးလ်အသင်းရဲ့ ဒတ်ချ်လူမျိုးအသင်းခေါင်းဆောင်ဗန်ဒိုက်ကလည်း ပရီးမီးယားလိဂ်/အင်္ဂလန်အမှတ်ပေးပြိုင်ပွဲသမိုင်းမှာ ချန်ပီယံဆုကိုင်မြှောက်နိုင်တဲ့ ပထမဆုံးဒတ်ချ်လူမျိုးအသင်းခေါင်းဆောင်ဖြစ်လာမှာပါ။
ပရီးမီးယားလိဂ်ပြိုင်ပွဲမှာ ကန်တိုနာ၊ ဗီယာရာ(ပြင်သစ်)၊ ရွိုင်ကိန်း(အိုင်ယာလန်)၊ ဖာနန်ဒင်ဟို(ဘရာဇီးလ်)၊ ဂွန်ဒိုဂန်(ဂျာမနီ)၊ ကွန်ပနီ(ဘယ်လ်ဂျီယံ)၊ ဗီဒစ်(ဆားဘီးယား)အစရှိတဲ့ နိုင်ငံခြားသားအသင်းခေါင်းဆောင်တွေက ချန်ပီယံဆုတွေကို ကိုင်မြှောက်အောင်ပွဲခံခဲ့ကြပေမယ့် ဒတ်ချ်လူမျိုးအသင်းခေါင်းဆောင်တွေထဲက တစ်ဦးတစ်ယောက်မှ ချန်ပီယံဆုမကိုင်မြှောက်ဖူးသေးတာကြောင့် ဗန်ဒိုက်ဟာ ပရီးမီးယားလိဂ်ချန်ပီယံဆု(အင်္ဂလန်အမှတ်ပေးချန်ပီယံဆု)ကို ကိုင်မြှောက်အောင်ပွဲခံနိုင်တဲ့ ပထမဆုံးဒတ်ချ်လူမျိုးအသင်းခေါင်းဆောင်ဖြစ်လာမှာပါ။
လီဗာပူးလ်အသင်းဟာ ဒီတစ်ပတ် တနင်္ဂနွေနေ့နေ့မှာ ကစားမယ့် ပရီးမီးယားလိဂ်ပွဲစဉ်(၃၄) လီဗာပူးလ်-စပါးပွဲမှာ အနိမ့်ဆုံးရမှတ်(၁)မှတ်ရခဲ့ရင် ဒီရာသီ ပရီးမီးယားလိဂ်ချန်ပီယံအသင်းအဖြစ် လက်ကျန်ပွဲ(၄)ပွဲအလိုမှာ အောင်ပွဲခံနိုင်မှာဖြစ်ပါတယ်။
