အစ်ဝစ်ချ်အသင်းရဲ့ဒုတိယဂိုးအတွက် ချယ်လ်ဆီးပရိသတ်တွေကို နည်းပြမာရက်စ်ကာပြစ်တင်
မနေ့က ကစားခဲတဲ့ ချယ်လ်ဆီး(၂-၂)အစ်ဝစ်ချ် ပရီးမီးယားလိဂ်ပွဲစဉ်မှာ အစ်ဝစ်ချ်အသင်းသွင်းယူခဲ့တဲ့ ဒုတိယဂိုးအတွက် အီတလီလူမျိုးနည်းပြမာရက်စ်ကာက ချယ်လ်ဆီးအသင်းပရိသတ်တွေကို အပြစ်တင်ခဲ့ပါတယ်။
ချယ်လ်ဆီးအသင်းဟာ ဒီပွဲစဉ်ရဲ့ပထမပိုင်းမှာ အစ်ဝစ်ချ်အသင်းရဲ့(၂-၀)ဂိုးနဲ့ဦးဆောင်ခြင်းကို ခံခဲ့ရပြီး ဒုတိယပိုင်းမှာ ချေပဂိုး(၂)ဂိုးပြန်သွင်းနိုင်ခဲ့တဲ့အတွက် သရေရလဒ်ထွက်ပေါ်ခဲ့တာဖြစ်ပြီး ဒီရလဒ်ကြောင့် ပရီးမီးယားလိဂ်အမှတ်ပေးဇယားအဆင့်(၆)နေရာအထိ ကျဆင်းသွားခဲ့တာပါ။
ဒီပွဲမှာ ချယ်လ်ဆီးဂိုးသမားဆန်းချက်ဇ်ဟာ နည်းပြမာရက်စ်ကာရဲ့နည်းစနစ်ကိုဆန့်ကျင်ပြီး ဘောလုံးကို အနီးပေးရမယ့်အစား အဝေးကိုကန်တင်ခဲ့တာကြောင့် အစ်ဝစ်ချ်အသင်းရဲ့ဒုတိယသွင်းဂိုးကို ခွင့်ပြုခဲ့ရတာဖြစ်ပါတယ်။ မာရက်စ်ကာက ဂိုးသမားဆန်းချက်ဇ်ကို ကာကွယ်ပြီး ပရိသတ်တွေရဲ့လှောင်ပြောင်မှုကြောင့် အမှားအယွင်းပြုလုပ်ခဲ့တယ်လို့အဓိပ္ပါယ်ရတဲ့ စကားကို ပွဲအပြီးမီဒီယာတွေ့ဆုံမှုမှာ ဆိုခဲ့ပါတယ်။
မာရက်စ်ကာက"ပတ်ဝန်းကျင်ကြောင့် ကျွန်တော်တို့ဟာ အဝေးကိုကန်ပေးဖို့ဆုံးဖြတ်ခဲ့ပြီး ဒါကြောင့် ဂိုးပေးခဲ့ရတာပါ။ ကျွန်တော်တို့ဟာ သန်မာဖို့လိုပြီး လုပ်စရာရှိတဲ့အလုပ်ကို ဆက်လုပ်ရမှာပါ။ ကျွန်တော်တို့ဟာ ပရိသတ်တွေအားပေးမှုရှိရင် သန်မာတယ်လို့ အကြိမ်ကြိမ်ပြောဖူးပါတယ်။ ဒီလိုအခြေအနေမှာ ပရိသတ်တွေမပျော်ရွှင်ဘူးဆိုတာ သိပေမယ့် ကျွန်တော်တို့အတွက် သူတို့ရဲ့အားပေးမှုပိုလိုအပ်ပါတယ်"လို့ ဆိုခဲ့ပါတယ်။
ပရီးမီးယားလိဂ်ပြိုင်ပွဲဟာ လာမယ့်ရာသီအတွက် ချန်ပီယံလိဂ်ဝင်ခွင့်(၅)နေရာအထိ ရရှိထားတာကြောင့် ချယ်လ်ဆီးအသင်းအနေနဲ့ အဆင့်(၅)အတွင်းဝင်ရောက်ပြီး ရာသီအဆုံးသတ်နိုင်ဖို့ လက်ကျန်ပွဲစဉ်တွေမှာ ရလဒ်ကောင်းတွေရယူနိုင်ဖို့လိုအပ်နေတာပါ။ ချယ်လ်ဆီးအသင်းဟာ လာမယ့်ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းအိမ်ကွင်း သွားရောက်ယှဉ်ပြိုင်ရမှာဖြစ်ပါတယ်။
