အားလုံးမျှော်လင့်ထားတဲ့အတိုင်း ပရီးမီးယားလိဂ်ကိုအတူတူ တန်းတက်လာတဲ့ လိဒ်စ်ယူနိုက်တက်နဲ့ ဘန်လေ

ချန်ပီယံရှစ်ကလပ် လိဒ်စ်ယူနိုက်တက်နဲ့ ဘန်လေအသင်းတို့ဟာ မနေ့က ကစားခဲ့တဲ့ ချန်ပီယံရှစ်ပွဲစဉ်(၄၄)မှာ ပြိုင်ဘက်တွေကို အသီးသီးအနိုင်ယူခဲ့ပြီးနောက် ရမှတ်(၉၄)မှတ်စီနဲ့အတူ ပရီးမီးယားလိဂ်ကို တပြိုင်တည်းအတူတူတန်းတက်လာကြပါတယ်။

လိဒ်စ်ယူနိုက်တက်က စတုတ်စီးတီးအသင်းကို အိမ်ကွင်းမှာဂိုးဒါဇင်ဝက်သွင်းပြီး (၆-၀)ဂိုး၊ ဘန်လေက ရှက်ဖီးယူနိုက်တက်အသင်းကို အိမ်ကွင်းမှာ(၂-၁)ဂိုးတို့နဲ့ အနိုင်ယူခဲ့တာပါ။

အဆင့်(၃)က ရှက်ဖီးယူနိုက်တက်အသင်းအနေနဲ့ ဘန်လေကို ရှုံးနိမ့်ခဲ့ပြီးနောက် ရမှတ်(၈၆)မှတ်သာရရှိထားတာကြောင့် လက်ကျန်ပွဲတွေမှာ အဆင့်(၁၊ ၂)က အသင်းတွေကို လိုက်မမီနိုင်ဖို့ သေချာသွားတာကြောင့် လိဒ်စ်ယူနိုက်တက်နဲ့ ဘန်လေတို့က တန်းတက်ခွင့်ကို ရယူနိုင်ခဲ့တာပါ။

အဆင့်(၁၊ ၂)က လိဒ်စ်ယူနိုက်တက်နဲ့ ဘန်လေတို့ အနိုင်ရပေမယ့် ထူးခ​ြားတာကတော့ မနေ့က ကစားခဲ့တဲ့ ချန်ပီယံရှစ်ပွဲတွေမှာ အဆင့်(၃)က အဆင့်(၇)အထိ အသင်းတွေဖြစ်တဲ့ ရှက်ဖီးယူနိုက်တက်၊ ဆန်းဒါးလန်း၊ ဘရစ္စတိုးလ်စီးတီး၊ ကိုဗင်ထရီ၊ မစ်ဒယ်ဘရော့ အစရှိတဲ့အသင်းအားလုံး ရှုံးပွဲတွေ့ခဲ့ကြတာပါ။ ပရီးမီးယားလိဂ်တန်းတက်ခွင့်တစ်နေရာကျန်သေးပြီး ဒီအသင်းတွေအနေနဲ့ Play-offs ဝင်ခွင့်နေရာကို ရယူရမှာဖြစ်ပေမယ့် ဒီတစ်ပတ်မှာတော့ အားလုံးရှုံံးခဲ့ကြတာပါ။

လိဒ်စ်ယူနိုက်တက်နဲ့ ဘန်လေအသင်းတို့အနေနဲ့ မနေ့ကပွဲတွေမှာ ရလဒ်ကောင်းတွေရယူနိုင်ခဲ့ပြီး နှစ်သင်းစလုံး ပရီးမီးယားလိဂ်တန်းတက်ခွင့်လက်မှတ်ရခဲ့ကြပေမယ့် လက်ကျန်ပွဲ(၂)ပွဲမှာ အမှားမခံဘဲ ချန်ပီယံဆုကို အပြိုင်လုယူရဦးမှာပါ။ လိဒ်စ်ယူနိုက်တက်အသင်းက ဘန်လေထက် ဂိုးကွာခြားချက်(+၁၄)ဂိုးတောင် အသာရနေတာကြောင့် (၂)ပွဲလုံးအနိုင်ကစားနိုင်ခဲ့ရင် ဘန်လေရဲ့ရလဒ်တွေကို ကြည့်နေစရာမလိုဘဲ ချန်ပီယံအဖြစ် အောင်ပွဲခံနိုင်မှာပါ။

လိဒ်စ်ယူနိုက်တက်အသင်းဟာ ၂၀၂၂-၂၃ ရာသီက ပရီးမီးယားလိဂ်မှာ အဆင့်(၁၉)သာရခဲ့တာကြောင့် ချန်ပီယံရှစ်ကို တန်းဆင်းခဲ့ရပြီး တန်းဆင်းပြီး(၂)ရာသီအကြာမှာ ပရီးမီးယားလိဂ်တန်းတက်ခွင့်ကို ပြန်ယူနိုင်ခဲ့တာပါ။ ဘန်လေအသင်းက ပြီးခဲ့တဲ့ ၂၀၂၃-၂၄ ရာသီ ပရီးမီးယားလိဂ်မှာ အဆင့်(၁၉)သာရခဲ့တာကြောင့် ချန်ပီယံရှစ်ကို တန်းဆင်းခဲ့ရပြီး တန်းဆင်းပြီး ချန်ပီယံရှစ်ပြိုင်ပွဲမှာ တစ်ရာသီသာကစားကာ ပရီးမီးယားလိဂ်တန်းတက်ခွင့်ကို ပြန်ယူနိုင်ခဲ့တာပါ။